Dy të rinjtë e shpallur në kërkim për përplasje me efektivë të policisë në Tiranë janë djemtë e Tom Doshit: James dhe Markos Doshi, përkatësisht 22 dhe 20 vjeç.
Sipas bluve, vëllezërit Doshi, bashkë me një tjetër person janë konfliktuar me një 38-vjeccar për motive të dobëta në rrugën “Ismail Qemali”, pranë kryeministrisë. Më pas janë konfliktuar dhe me efektivë të policisë të komisariatit numër 2. Dy vëllezërit nuk janë arrestuar nga policia dhe janë shpallur në kërkim, ndërsa personi i tretë, që raportohet se është truproja i vëllezërve, është vënë në pranga.
Ngjarja
Tre personat, “gjatë një konflikti për motive të dobëta, në rrugën ‘Ismail Qemali’ kanë goditur me sende të forta R.S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës. Eduart Laskaj, 34 vjeç, është vënë në pranga, ndërsa Markos Doshi dhe James Doshi janë larguar”, thuhet në një njoftim të policisë këtë të Martë, që shton se “vijon puna për kapjen e tyre”.
Akuzat
I arrestuari Eduart Laskaj, 34 vjeç, 34 vjeç, akuzohet për veprat penale ‘Goditja për shkak të detyrës’, ‘Plagosja e lehtë me dashje’ dhe ‘Prishja e qetësisë publike’.
Dy djemtë e Tom Doshit akuzohen për veprat penale ‘Plagosja e rëndë me dashje’, ‘Goditja për shkak të detyrës’, ‘Kundërshtimi i punonjësit të Policisë së rendit publik’, ‘Mosbindja ndaj urdhrit të punonjësit të Policisë së rendit publik’ dhe ‘Prishja e qetësisë publike’, të kryera në bashkëpunim.
Sherri nisi në rrjetet sociale
Dyshohet se sherri mes palëve nisi në rrjetet sociale. Sipas raportmeve mediatike, i arrestuari ka deklaruar në dëshminë e tij se konflikti nisi fillimisht në rrjetet sociale mes një prej djemve të Tom Doshit dhe 38-vjeçarit me inicialet R.S.. Raportohet se të dy kanë debatuar fillimisht në rrjetet sociale për një foto Instagrami, më pas janë takuar nga afër. Por kur sherri mes djalit të Doshit dhe 38-vjeçarit ka agravuar, i riu është larguar, ka shkuar ka marrë të vëllanë dhe truprojën e tij. Më pas janë takuar të katër në rrugën ‘Ismail Qemali’, por ‘sqarimi’ u kthye në dhunë. James dhe Markos Doshi raportohet se goditën me grushte e shufra hekuri 38-vjeçarin që përfundoi në spital.
Konfliket e mëparshme
Emri i djemve të Tom Doshit është përmendur edhe më herët për ngjarje të ngjashme.
Më 28 Janar 2021, referuar raportimeve mediatike, gjatë një feste në një klab në kryeqytet, ndodhi një sherr mes dy grupeve. Me njërin krah ishin dhe djemtë e Tom Doshit, ndërsa me tjetrin u raportua se ishte djali i Samir Manes.
Në 16 korrik 2020, u raportua se në orët e para të mëngjesit, dy vëllezërit ishin protagonistë të një tjetër konflikti në Tiranë, ku u qëllua dhe me armë zjarri, e u plagosu truproja e djalit të një biznesmeni.
Në vitin 2016, u raportua po ashtu se James Doshi asokohe 16 vjeç, u shoqërua në polici pas një sherri me një tjetër person, po në kryeqytet. Bashkë me të u shoqërua edhe djali i një ish-deputeti.
Ndërkohë, në media është raportuar se dy trashëgimtarët e ish-deputetit të shpallur non grata nga SHBA, bëjnë një “jetë sheikësh”, falë pasurisë së të atit.
