Policia e Pogradecit ka vënë në pranga 5 persona të cilët kanë bashkëpunuar dhe kanë ndihmuar dy autorët e dyshuar të plagosjes së Johan Muçllarit 22 vjeç, djalit të Jetmir Muçllarit, pronarit të hotel Voloreka në Tushemisht.
Të arrestuarit
Si autorë të dyshuar të plagosjes së 22-vjeçarit, policia ka shpallur në kërkim Firdeus Berberin 21 vjeç dhe Greisi Maxharin 23 vjeç.
Ndërsa në pranga janë vënë 5 persona, që policia i konsideron si bashkëpunëtorë të dy autorëve të dyshuar. Të arrestuar janë Fatjon Bono 32 vjeç banues në fshatin Vërdovë, Kristian Kresto 26 vjeç; Hekuran Gjona 22 vjeç; Ledion Shkullaku 27 vjeç dhe Rudi Shaho 28 vjeç, banues në Pogradec.
Këta persona, në bashkëpunim me njëri-tjetrin, thotë policia, me automjete dhe me veprime aktive dyshohet se kanë ndihmuar autorët e ngjarjes që të largohen pas krimit.
Në cilësinë e provës materiale u gjet dhe sekuestrua automjeti tip “Volkswagen Golf” në përdorim të Fatjon Bonos, i cili është përdorur në ngjarje, si edhe automjetet tip “Benz” dhe “BMW X5”, me të cilët janë ndihmuar Firdeus Berberi dhe Greisi Maxhari për t’u larguar nga vendi i ngjarjes.
Bashkëpunëtorët akuzohen për moskallëzim krimi, veprime që pengojnë zbulimin e së vërtetës dhe përkrahje e autorit të krimit.
Ndërsa Firdeus Berberi 21 vjeç dhe Greisi Maxhari 23 vjeç vijojnë të jenë në kërkim nga policia dhe akuzohen për vrasja me dashje e kryer në bashkëpunim e mbetur në tentativë, armëmbajtje pa leje dhe prishja e qetësisë publike.
Plagosja
Johan Muçllari ndodhet aktualisht në Spitalin e Traumës në Tiranë. Ai është i plagosur me plumb në këmbë dhe është goditur me thikë në kokë, pasditen e djeshme.
Dyshohet se fillimisht, autorët kanë ngacmuar me fjalë Johan Muçllarin i cili u është kthyer dhe janë konfliktuar me grushte fillimisht, e më pas sherri ka degraduar në përdorimin e armës dhe thikës nga autorët.
Më 8 Gusht të vitit 2020, hoteli Voloreka në Tushemisht, u qëllua me breshëri arme në pikun e sezonit turistik dhe ku shënjestra ishte pikërisht dhoma ku flinte 22-vjeçari.
