Një 30-vjeçar shqiptar u arrestua nga Guardia Di Finanza e Lecco-s, në autostradën e Parmës. Shqiptari, emri i të cilit nuk bëhet publik, u kap me 14 kilogramë kokainë.
I riu qëndronte në Mariano Comense, një zonë në Como, por operonte në zonën e Lecco-s dhe ndiqej prej kohësh nga autoritetet.
Sipas raportimeve mediatike, shqiptari u ndalua në autostradë ku brenda makinës iu gjetën 11 kilogramë kokainë të ndarë në disa pako.
Pas kontrollit në shtëpinë e tij u gjetën edhe 3 kilogramë të tjera kokainë. 30-vjeçari u arrestua në kushtet e flagrancës dhe është dërguar në një burg në Parma.
Hetuesit besojnë se nëse droga do të nxirrej në treg do të arrinte fitime deri në 2 milionë Euro.
Ndërkohë hetimet vazhdojnë për të zbuluar origjinën e drogës dhe personat e tjerë që mund të jenë përfshirë në krim.
