Një 31-vjeçar është arrestuar nga policia e Tiranës pasi në makinë i është gjetur 1 kg kanabis. Sipas bluve, ai shiste hashash në doza në zonat e Laprakës dhe ish-Fushës së Aviacionit.
“Shërbimet e Komisariatit të Policisë Nr.2, bazuar dhe në informacionet e marra në rrugë operative se një shtetas shpërndante lëndë narkotike kanabis sativa në zona të ndryshme të Tiranës, organizuan operacionin policor të koduar ‘Hide’. Në kuadër të këtij operacioni u bë kapja dhe arrestimi në flagrancë i shtetasit H.H., 31 vjeç, banues në Tiranë, për veprën penale ‘Prodhimi dhe shitja e narkotikëve’”, njoftoi policia këtë të Shtunë.
Ndalimi
Sipas të njëjtave burime, në rrugën ‘Dritan Hoxha’, në afërsi të një kompleksi pallatesh, gjatë kontrollit të ushtruar në automjetin e 31-vjeçarit nga efektivët, është gjetur dhe sekuestruar 1 kg lëndë e dyshuar narkotike kanabis sativa.
“Nga veprimet hetimore të kryera, ka rezultuar se ky shtetas, pasi siguronte sasi të konsiderueshme të lëndës narkotike cannabis sativa, e ndante atë dhe e shiste më pas në doza, në zonën e Laprakës dhe të Fusha e Aviacionit”, thuhet më tej në njoftimin e policisë, që ka publikuar edhe pamje nga aksioni.
