Tyson Fury konfirmohet kampion bote në peshën e rëndë WBC, pas fitores me KO ndaj rivalit të tij Dillian Whyte.
Fury fitoi me KO në raundin e gjashtë, kur hodhi në tapet Whyte, pas një seri grushtesh që e çoroditën rivalin e tij.
Një sfidë që në raundet e para nuk pati shumë shkëndija edhe pse dy boksierët shpesh duelonin edhe kur gjyqtari kërkonte që të ndaheshin, duke bërë që ai t’u tërhiqte hera-herës vëmendjen. Gjithsesi, Fury është më superior se rivali i tij, duke e goditur Whyte në trup dhe kokë, duke përfituar edhe nga shtatlartësia.
Në raundin e gjashtë Fury është i pamëshirshëm, duke e goditur disa herë Whyte, që nuk e mbajnë më këmbët dhe bie në tapet, duke detyruar gjyqtarin ta ndalë sfidën.
Boksieri britanik qëndron kështu i pamposhtur në ring (32 fitore e 1 barazim). Për Whyte kjo është humbja e tretë në karrierë (ka edhe 28 fitore).
