Deputeti i PD-së, Edi Paloka, ka reaguar pas postimit në Twitter të ambasadores Yuri Kim, e cila u pozicionua në krah të Enkelejd Alibeajt në një incident parlamentar, ku ish-Kryeministri Sali Berisha kërkoi të fliste në foltore, ndërsa në të ndodhej kreu i Grupit Parlamentar demokrat.
Paloka shkruan, se njeriu duhet ta kuptojë se kur bëhet qesharak dhe të mos vazhdojë më.
“Është fatkeqësi kur njeriu nuk e kupton më, se vjen një moment që thjeshtë bëhesh qesharak me deklaratat e qëndrimet që mban…!’, shkruan Edi Paloka në faqen e tij në Facebook, duke reaguar ndaj ambasadores Yuri Kim.
Në një tjetër postim drejtuar diplomates amerikane, Paloka me ironi e pyet nëse mund të bëjë një listë të atyre që mund të bëhen ose jo në Kuvend.
“A mund të na bësh një listë zonja guvernatore se cfarë lejohet e çfarë nuk lejohet të bëjmë në Kuvendin e Shqipërisë që të jemi të qartë e mos bëjmë më gabime?”, ironizon Paloka.
Më herët, ambasadorja amerikane Yuri Kim, shkruante se “ditët e sulmit ndaj ndërtesave, rrahjes ose largimit të të tjerëve nga podiumet, kërcënimit të atyre që thonë me të drejtë “jo!”, akuzimit të të tjerëve për veprat e këqija që ka bërë, shtrembërimit të shtetit të së drejtës, llogaritjes së mosndëshkimit – ato ditë i përkasin një të shkuare që duhet. Të mos përsëritet!”.
