Një ditë më parë, policia e Tiranës njoftoi gjetjen e trupit të pajetë të 36-vjeçarit, Ilir Marku. Ai u gjet në një bunker, ndërsa pak ditë më parë ishte denoncuar nga familjarët e tij për largim nga banesa.
Ndërkohë sot janë zbuluar detaje të reja lidhur me ngjarjen e rëndë.
Mësohet se policia ka arrestuar Mariglen Isufin, 28 vjeç, i cili akuzohet nga policia për veprën penale “fshehje të kufomës”.
Ditën e ngjarjes, Isufi ka qenë bashkë me Ilir Markun në afërsi të bunkerit, në një lëndinë me bar, ndërsa kanë konsumuar lëndë narkotike. Nga mbidoza, Ilir Marku ka humbur ndjenjat. Menjëherë pas ngjarjes, Mariglen Isufi është larguar për në banesë, duke e lënë mikun e tij të vetëm. Mëngjesin tjetër ka shkuar sërish tek i njëjti vend dhe Ilir Markun e ka gjetur të vdekur.
Trupin e pajetë të 36-vjeçarit e ka tërhequr zvarrë për 10 apo 15 metra dhe e ka futur në brendësi të bunkerit, duke e mbuluar me kartona. Pas dyshimeve se Marku konsumonte lëndë narkotike, policia intensifikoi kërkimet, ndërsa ra në gjurmët e viktimës.
Pas veprimeve operative u identifikua edhe Mariglen Isufi, i cili pas arrestimit u tha hetuesve se nuk bëri denoncim në polici pasi kishte pasur frikë.
