Të dhënat e Komisionit Qendror të Zgjedhjeve tregojnë se të moshuarit janë grupmosha që merr pjesë më masivisht në proceset elektorale, ç’ka do të thotë se janë edhe vendimmarrësit sa i takon qeverisjes së vendit. Ndërsa të rinjtë, apo votuesit për herë të parë, janë neglizhentë ndaj zgjedhjeve, qofshin vendore apo parlamentare.
“Votuesit për herë të parë nuk votojnë, 65-vjeçarët shkojnë masivisht”, tha kreu i KQZ-së Ilirian Celibashi, në një deklaratë për mediat këtë të Mërkurë.
Komisioni Qendror i Zgjedhjeve publikoi të dhënat e auditimit të pajisjeve të identifikimit elektronik ku edhe në 6 mars ishin konstatuar raste të dyshimta për votim të shumëfishtë. Fati i këtyre rasteve do të caktohet në zyrat e prokurorisë, ndërsa për zgjedhjet e ardhshme, KQZ ka një apel për partitë parlamentare, miratoni sa më parë reformën zgjedhore.
Në zgjedhjet parlamentare dhe ato të pjesshme u implemntua projekti pilot për votimin dhe numërimin elektronik. Por, a do të shtrihet ky projekt në të gjithë vendin në zgjedhjet vendore të 2023?
“Nëse e vendos politika që duhet, duhet ta caktojë tani se s’kemi kohë”, u shpreh Celibashi.
