Mjeku epidemiolog Ilir Alimehmeti ishte i ftuar mëngjesin e së mërkurës në “Dita Jonë” ku foli rreth situatës ku ndodhet situata e pandemisë së koronavirusit në vendin tonë.
Sipas mjekut të njohur, vendi ynë, ashtu si gjithë Europa, po kalojnë një situatë të relaksuar përsa i përket koronavirusit, kjo edhe për shkak të imunitetit të krijuar në mënyrë natyrale apo edhe me vaksina.
Për Alimehmetin, autoritetet tashmë duhet të heqin dorë nga llogaritja e rasteve pozitive dhe të merren vetëm me rastet e rënda, hospitalizimet dhe vdekjet.
“Imuniteti kolektiv në Europë është goxha i fortë. Por duhet të presim, ka pasur një ulje të imunitetit me kalimin e kohës. Duhet të heqim dorë nga kalkulimi i rasteve pozitive, ne duhet të merremi vetëm me rastet e rënda, humbjet e jetës. Këto janë indikatorët, pasi të tjerat varen nga sa testohemi, sa i falsifikojmë këto teste. Shtrimet në spital nuk mund të falsifikohen”, tha Alimehmeti.
