Një 28-vjeçar u paraqit mbrëmjen e së martës në Urgjencën e spitalit Rajonal të Shkodrës, i plagosur me armë zjarri. Nga raportimet mësohet se i plagosuri është shtetasi E.R 28 vjeç, i cili kishte marrë një plumb në këmbë, por pa rrezik për jetën.
Policia u njoftuar nga stafi mjekësor lidhur me ngjarjen, ndërsa ka nisur hetimet.
Më parë u raportua për të shtëna me armë zjarri në Shkodër, por ngjarja deri tani mbetet mister, pasi nuk ka të dhëna se si mund të ketë ndodhur.
Njoftimi i Plotë:
Shkodër/Informacion paraprak
Më datë 19.04.2022, rreth orës 22:00, në lagjen “Perash”, Shkodër, në rrethana ende të paqarta, është plagosur me armë zjarri në këmbë, shtetasi E. R., 28 vjeç, banues në lagjen “Partizani”, Shkodër, i cili ndodhet jashtë rrezikut për jetën.
Shërbimet e Policisë me marrjen e njoftimit për të shtëna me armë zjarri, kanë shkuar menjëherë në vendngjarje, është rrethuar zona, janë ngritur pika kontrolli dhe vijon krehja e territorit për të bërë të mundur identifikimin dhe kapjen e autorit/ëve.
Grupi hetimor ndodhet në vendngjarje dhe nën drejtimin e Prokurorisë, po punon për fiksimin e çdo prove të mundshme, që do ti shërbejë hetimit për zbardhjen e ngjarjes.
