Pas arrestimit për pengmarrjen e Ermil Sorrës në Qytetin Studenti, Denalda Çezmës dhe Shkëlqim Koçekut iu komunika këtë të Martë masa e sigurisë nga Gjykata e Tiranës.
Ata u lanë nën masën arrest me burg. E njëjta masë u dha në mungesë edhe për Sulltan Piracin, i shpallur në kërkim policor.
Në seancë, nga pala mbrojtëse, u kërkua lirimi nga qelia i të arrestuarve.
Në bashkëpunim me njëri-tjetrin, ata akuzohen se kanë marrë peng Ermil Sorrën në muajin Janar, për shkak të një borxhi që i kishte marrë Denalda Çezmës dhe nuk ia kishte kthyer.
Kjo e fundit dyshohet se i kishte dhënë 20 mijë euro Sorrës, me të cilin kishte shoqëri, pasi ai i kishte thënë se ishte i prekur nga kanceri dhe i duheshin paratë për t’u kuruar. Por, 31-vjeçari nuk i ka kthyer borxhin dhe ajo kërkoi ndihmën e të fejuarit dhe mikut të tij që ta merrnin peng. Siç njofton policia e kryeqytetit, Shkëlqim Koçeku, 37-vjeç, nën masë ‘arrest shtëpie’ për ‘armëmbajtje pa leje’, dhe Sulltan Picari, në bashkëpunim, e morën të riun dhe e dërguan në banesën e 37-vjeçares Denalda Çezma, ku dhe e dhunuan.
Policia ka vënë në pranga, Shkëlqim Koçekun dhe Denalda Çezmën, si dhe ka shpallur në kërkim Sulltanin Picarin, për veprën penale “Heqja e paligjshme e lirisë” duke përdorur torturën, kryer në bashkëpunim.
Ermal Sorra u ka thënë pengmarrësve që ta lironin pasi ishte mik i Nehat Kullës, i cili nuk jeton më, por që njihej si “i forti i Tiranës”.
