Një person është arrestuar dhe një tjetër është shpallur në kërkim lidhur me grabitjen e postës në Kamëz, ditën e djeshme.
Policia njoftoi këtë të Martë arrestimin e Albert Kurtit, 20 vjeç, banues në Kamzë, për veprën penale “Vjedhja me dhunë” kryer në bashkëpunim.
Gjithashtu, u shpall në kërkim bashkautori tjetër, Elis Suçi, 30 vjeç, banues në Kamzë, i dënuar më parë për vjedhje.
“Gjatë veprimeve hetimore ka rezultuar se këta shtetas, më datë 18.04.2022, rreth orës 14:20, nën kërcënimin e një arme, kanë marrë një shumë parash në filialin e postës Shqiptare në Kamzë dhe janë larguar. Në cilësinë e provës materiale janë sekuestruar një aparat celular dhe veshje, të cilat autorët dyshohet se i kanë përdorur gjatë kryerjes së krimit”, thuhet në njoftimin e bluve.
