Ish-Kryeministri Sali Berisha u shpreh mbrëmjen e sotme se po i jepet fund kryetarokracisë në Partinë Demokratike dhe emrat po propozohen nga baza ose kanë shprehur dëshirën për të garuar dhe askush nuk ka marrë një vendim nëse duhet të kandidojnë ose jo.
“Po ndodh diçka që kurrë s´ka ndodhur më parë me partitë politike në vend, asnjë kandidat nuk po pengohet të garojë, nëse ai plotëson kushtet”, tha Berisha në emisionin “Çim Peka Live”.
Ish-Kryeministri tha se për herë të parë Kryesia qendrore nuk po seleksionon kandidatët dhe kjo është diçka që s´ka ndodhur.
“Në Prrenjas fitoi Arjan Karriqi, që e uroj përzemërsisht dhe ai nuk ishte pjesë e Foltores. Në Kamëz fitoi Arjan Hoxha, i cili ishte pjesë e Kuvendit të thirrur nga Lulzim Basha me 18 dhjetor.
Dasho Aliko nuk kandidoi në Gjirokastër, e kam mik timin, dhe në garë nuk hyri, pra nuk ka një frymë siç mundohen ta paraqesin.
Pjesë e procesit është Isa Sakja, njeri me kontribute në PD, pra janë procese që po i bashkojnë demokratët”, tha Berisha.
Ish-Kryeministri deklaroi se baza e PD po shkon drejt bashkimit të vërtetë. “Primaret në PD do ti përshtasim në variantin më të mirë, duke marrë edhe një kompani që do të na asistojë. Nuk them se këto zgjedhje nuk kanë pasur probleme, por i dhamë fund modelit të kryetarokracisë. Gjithsesi mund të them se vota nuk mori rëndësinë e duhur për shkak të listave, duke mos pasur mundësinë për gjithëpërfshirjen e anëtarësisë”, tha Berisha.
