Vijojnë hetimet për atentatin ndaj djalit të policit në Durrës, Orlando Paplekaj. Paplekaj po udhëtonte me një kamionçinë mesditën e së shtunës, 16 prill në rrugën Xhafzotaj-Shijak kur u qëllua me armë zjarri, arriti t’i shpëtonte. Burime nga policia bëjnë me dije se po hetohet në disa pista.
Një nga pistat në të cilën po heton grupi hetimor është lidhja që ai ka me vëllezërit Haxhia të ekzekutuar 2 vite më parë. Paplekaj me vëllezërit Haxhia kanë lidhje krushqie me njëri-tjetrin, megjithatë kjo është një pistë e vakët deri më tani për shkak se lidhja e tyre është e largët.
Një tjetër pistë në të cilën është edhe mundësia që i gjithë ky atentat të ketë qenë i inskenuar me qëllim përfitimit e azilit. Kjo edhe për faktin se kamionçina me të cilën po udhëtonte 31-vjeçari nuk ka asnjë shenjë të plumbit, ç’ka ka shtuar dyshimet e grupit hetimor se e gjitha mund të jetë një inskenim.
Nuk përjashtohet as pista që të jetë një atentat për shkak të detyrës që i riu me origjinë nga Lekbibaj e Tropojës. Ai më herët ka qenë efektiv policie, e më pas edhe punonjës sigurie në disa kompani private.
Së fundit, ai punonte si shpërndarës i bombolave të gazit dhe atentati iu bë pikërisht teksa ai ishte gjatë orës së punës. Nuk përjashtohet as hipoteza që atentati të jetë paralajmërim ndaj punëdhënësit të Paplekajt.
Babai i dy fëmijëve, u qëllua nga një makinë “Golf” në lëvizje, që pas të shtënave u largua përmes një rruge të ngushtë, me dalje në autostradën Tiranë-Durrës. Nga të shtënat, ai humbi kontrollin e drejtimit të automjetit e doli nga rruga, por nuk pësoi dëmtime.
Grupi hetimor mori dëshminë e pesë personave të tjerë që ndodheshin në zonë gjatë atentatit dhe kamerat e sigurisë, me synim zbardhjen e ngjarjes. Nga ana tjetër babai i tij, Prel Paplekaj, është polici i rendit në Durrës dhe është në prag të pensionit. Ata banojnë në lagjen 15 të Porto Romanos, ndërsa kanë ardhur në Durrës pas vitit 1991 nga Tropoja.
