Ish-Kryeministri Sali Berisha akuzoi Lulzim Bashën dhe Enkelejd Alibeajn se po vijojnë lojën për të paraqitur një situatë problematike në Partinë Demokratike.
Berisha tha se ata po përpiqen qe me ndihmën e Edi Ramës të anulojnë edhe Kuvendin e 11 dhjetorit.
“Është një lojë që mesa duket po shkon drejt asaj që Basha e Alibeaj do të krijojnë partinë e tyre”, tha Berisha.
Ish-Kryeministri tha se deputetët janë krahu legjislativ i një partie, por nuk janë krahu ekzekutiv i partisë.
“Skema më e mirë e bashkimit të demokratëve është ajo që kam paraqitur, përmes një procesi votimi të lirë. Deputetët duhet të shmangin çdo përpjekje për manipulim nga Lulzim Basha dhe Enkelejd Alibeaj për llogari të EEdi Ramës.
Çdo deputet duhet të pyesë veten: a e njeh Kuvendin e 11 dhjetorit? Alibeaj nuk mund të marrë kompetenca ekzekutive sepse e ka emëruar Gazment Bardhi, i cili u shkarkua nga Kuvendi i 11 dhjetorit”, tha Berisha.
Në emisionin “Çim Peka Live”, Berisha tha se garantonte cilindo deputet që janë të mirëpritur në bazën e PD.
“Sa më shumë kohë të kalojë aq më keq për ta, ndaj dhe e them se duhet të zbresin në bazë, pasi anëtarësia e PD është pvr bashkimin. Anëtarësia pret që deputetët të jenë në krye të betejës në Parlament me Edi Ramën”, tha Berisha.
Ai u shpreh se deputetët janë të mirëpritur për të korrigjuar çdo gabim të mundshëm. “Mos të ngaterrojmë propozimet e deputetëve me manipulimet e Enkelejd Alibeajt, i cili mashtroi mediat duke thënë se ka firmat e 32 deputetëe, ndërkohë që ka firmat e Lulzim Bashës dhe Gazment Bardhit”, tha Berisha.
