Eduardo ‘Toto’ Salvio është shpallur në kërkim policor. Sipas mediave argjentinase, mesfushori i Boca Juniors akuzohet se mëngjesin e sotëm ka aksidentuar me makinë bashkëshorten e tij dhe më pas është arratisur. Aktualisht ai është shpallur në kërkim nga policia.
Sipas mediave lokale, ishte ora 5 e mëngjesit, kur Eduardo Salvio, futbollisti i Bocas, ka përplasur gruan e tij Magalí Aravena, në Puerto Madero.
Në një raport të shkurtër të policisë saktësohet se gruaja e ka gjetur lojtarin në makinën e saj me një femër tjetër, në kryqëzimin e Azucena Villaflor dhe Juana Manso.
Bashkëshortja e tij ka qëndruar para makinës dhe ka kërkuar që të bisedojnë. Në një moment, Salvio i ka dhënë gaz, duke e aksidentuar bashkëshorten dhe është larguar nga vendi i ngjarjes.
Magalí Aravena nga aksidenti ka pësuar një “traumë në gjymtyrën e poshtme të djathtë” dhe është trajtuar në spitalin mjekësor të Puerto Maderos. Policia lokale është vënë në kërkim të futbollistit.
Magalí Aravena është një modele dhe biznesmene e botës së modës.
