Kryetari i Grupit Parlamentar të Partisë Socialiste, Taulant Balla deklaroi se mazhoranca është e vendosur për realizimin e amnistisë fiskale.
Gjatë fjalës së tij në seancën parlamentare, Balla iu drejtua deputetëve të PD-së dhe tha se socialistët do t’i gjejnë votat e mjaftueshme, pra 3/5-at për ta kaluar projektligjin.
“Amnistinë fiskale do ta bëjmë. Nuk varemi nga ju sepse nuk kemi nevojë për ndryshim kushtetues. Duam 3/5 e votave dhe besoj se brenda Kuvendit do të jenë votat për ta mbështetur”, tha Balla.
Qeveria do të formalizojë paratë që sjellin emigrantët. Vendimi është marrë, pasi 66 % e qytetarëve kanë votuar pro në pyetësorin e Këshillimit Kombëtar.
Ndërsa, lidhur me legalizimin e kanabisit mjekësor, Balla u shpreh se kjo do të shërbejë për zhvillimin e ekonomisë, teksa dha shembullin e Maqedonisë së Veriut.
Sipas Ballës, qeveria mirëpret çdo instrument që sjell zhvillim ekonomik dhe të ardhura në vend.
Zyrtarisht PS ka në Kuvend 74 mandate dhe bashkë me 3 të PSD shkon në 77 mandate, ndërsa për miratimin e ligjit i duhen të paktën 84 vota, pra 7 mandate shtesë, që i përkasin opozitës.
