Nënkryetari i LSI, Petrit Vasili, komentoi në Syri Tv, raportin e DASH për Shqipërinë, i cili theksonte se korrupsioni është i shtrirë në të gjitha nivelet qeverisëse. Vasili tha se DASH ka zbërthyer dhe evidentuar shkatërrimin e institucionit të votës së lirë.
“Në raport është konsiderata e OSBE/ODIHR ku partia në pushtet shfrytëzoi dhe krijoi avantazhe shumë të mëdha falë të qënit në pushtet, patronazhistët dhe të dhënat personale duke dërrmuar institucionin e votës.”-tha Vasili.
Më tej nënkryetari i LSI theksoi se raporti i DASH pohoi shkatërrimin e pushtetit të drejtësisë.
“Jemi në konsiderata të thella dhe më negative se 8 vite më parë. Drejtësi që në vend të reformimit është thelluar drejt kapjes dhe duke theksuar pandëshkueshmërinë e qeveritarëve falë kësaj.”-deklaroi Vasili.
Sakaq, Petrit Vasili tha se raporti i DASH tregoi se media është në shantazh dhe është blerë nga qeveria dhe më e rënda është pohimi që gazetarët për këto shkaqe praktikojnë autocensurën.
“Nuk pohojnë të vërtetat sepse u bëhet presion dhe janë të persekutuar nga qeveria.”-tha Vasili.
Sa i përket korrupsionit, nënkryetari i LSI tha se është një e keqe gërryese dhe nuk i lë vendit të bëjë asnjë hap përpara. Ai është i mendimit se të gjitha pushtetet janë në dorë të qeverisë.
“Përgjegjësitë bien vetëm mbi qeverinë. Ka dhe diçka për Policinë e Shtetit e cila nuk zbaton ligjin. Shtet që shkon drejt destrukturimit, drejt shpërbërjes.”-deklaroi Vasili në Syri Tv.
