Bordi i Entit Rregullator të Energjisë miratoi këtë të mërkurë rritjen e tarifës së transmetimit të energjisë nga 0.75 lekë në 0.85 lekë për çdo kilovat/orë.
Kjo rritje erdhi pas kërkesës së OST për të rishikuar tarifën për shkak të rritjes së kostove të operimit të kompanisë në kushtet e krizës së energjisë dhe ku vetëm shpenzimet për mbulimin e humbjeve janë rritur me dy herë.
Abonentët familjarë do të preken nga kjo rritje, por sipas qeverisë kjo do të bëhet në mënyrë të tillë që ai që harxhon më shumë paguan më shumë.
Ndërkohë biznesi do të duhet të paguajë më shtrenjtë.
NJOFTIMI I ERRE
Në mbledhjen e Bordit të Entit Rregullator të Energjisë, sot në datën 13.04.2022 u shqyrtuan aplikimet dhe u miratuan tarifat për shërbimin e transmetimit dhe atë të shpërndarjes së energjisë elektrike si dhe u vlerësuan çmimet e furnizimit për klientët fundorë të lidhur në tension të ulët (0.4 kV).
Tarifat e miratuara mundësojnë kryerjen e mirëmbajtjes dhe investimeve më të nevojshme dhe të domosdoshme në rrjet dhe synojnë të garantojnë qëndrueshmërinë e sistemit dhe cilësinë e shërbimit të furnizimit të konsumatorëve.
Pavarësisht aplikimit të OST sh.a për miratimin e një tarife mesatare prej 1.41 lekë/kWh, ERE bazuar në analizën e të dhënave që lidhen me ushtrimin e aktivitetit të transmetimit të energjisë elektrike, vendosi të miratojë tarifën mesatare të transmetimit prej 0.85 lekë/kWh për periudhën rregullatore 1 maj 2022 – 31 dhjetor 2024.
Sa i përket aplikimit të OSSH, kjo e fundit ka përcjellë kërkesën për miratimin e tarifave për nivelet e tensionit si vijon:
• Tarifa e shpërndarjes së energjisë elektrike për vitin 2022 në tensionin 35 kV prej 2.62 Lekë/KWh;
• Tarifa e shpërndarjes së energjisë elektrike për vitin 2022 në tensionin 20/10/6 kV prej 4.14 Lekë/ KWh;
• Tarifa e shpërndarjes së energjisë elektrike për vitin 2022 në tensionin 0.4 kV prej 7.37 Lekë/KWh.
ERE në përputhje me kuadrin rregullator në fuqi dhe pas analizimit të të dhënave për qëllime të përcaktimit të tarifave të shpërndarjes, vendosi të miratojë tarifat e mëposhtme:
• Tarifa e shpërndarjes së energjisë elektrike për klientët e lidhur në nivelin e tensionit 35 kV – 1.55 Lekë/KWh
• Tarifa e shpërndarjes së energjisë elektrike për klientët e lidhur në nivelin e tensionit 0.6 – 20 kV – 3.99 Lekë/KWh
• Tarifa e shpërndarjes së energjisë elektrike për klientët e lidhur në nivelin e tensionit 0.4 kV – 6.42 Lekë/KWh
Ndërkohë, tarifa mesatare e shërbimit të shpërndarjes për periudhën 1 maj – 31 dhjetor 2022, me miratimin e tarifave të mësipërme, rezulton në vlerën prej 5.89 lekë/kWh kundrejt tarifës mesatare prej 6.69 Lekë/kWh, të kërkuar nga OSSH sh.a.
Tarifat e miratuara më lart janë munduar të marrin në konsideratë zvogëlimin sadopak të efekteve që lidhen me rritjen e çmimeve në tregun rajonal, i cili ka patur dhe do të ketë efektet e tij në financat e operatorëve të sistemeve të transmetimit dhe shpërndarjes së energjisë elektrike. Për rrjedhojë, ERE do të vijojë monitorimin e kostove të aktiviteteve të këtyre operatorëve në periudhën pasardhëse.
Me miratimin e tarifave të transmetimit dhe shpërndarjes, ERE paralelisht vlerësoi edhe efektet e këtyre tarifave ndaj çmimit final të furnizmit të klientëve familjarë dhe jofamiljarë në nivelin e tensionit të ulët 0.4 kV.
Për periudhën e mbetur të vitit 2022, ERE vendosi lënien në fuqi të çmimit të klientëve familjarë dhe jofamiljarë të lidhur në nivelin e tensionit 0.4 kV.
Në vijim paraqitet një tabelë ilustruese, që mundëson krahasimin e tarifave aktuale me tarifat e kërkuara nga operatorët si dhe tarifat e çmimet e miratuara nga ERE, të cilat do të jenë të aplikueshme duke filluar nga data 1 Maj 2022 si vijon:
Përshkrimi Njësia Tarifat deri me 30 prill 2022 Tarifat e propozuara nga Operatorët e Rrjetit Tarifat e miratuara nga ERE për periudhën 1 maj – 31 dhjetor 2022 Ndryshimi ne % I Tarifave aktuale vs miratuara Cmimi final i klienteve familjarë/jofamiljarë ne 0.4 kV
Tarifa e transmetimit leke/kWh 0.75 1.41 0.85 13% i pandryshuar
Tarifa e shperndarjes ne 35kV leke/kWh 1.5 2.62 1.55 3%
Tarifa e shperndarjes ne 20kV leke/kWh 3.9 4.14 3.99 2%
Tarifa e shperndarjes ne 10kV leke/kWh 4.79 4.14 3.99 -17%
Tarifa e shpërndarjes ne 6kV leke/kWh 4.79 4.14 3.99 -17%
Tarifa e shperndarjes ne 0.4kV leke/kWh 4.79 7.37 6.42 34%
Tarifa mesatare e shperndarjes leke/kWh 4.79 6.69 5.89 23%
