Analisti, Andi Bushati thotë se ka një kundërshtim mes raportit të DASH dhe qëndrimit të diplomatëve që “duan ta mbajnë mirë me qeverinë”.
Sipas Bushatit, “raportet e burokratëve bëjnë radiografinë reale të Shqipërisë” dhe ky “raport tregon totalisht të kundërtën që kanë vizatuar diplomatët amerikanë në Shqipëri”.
Bushati u shpreh se raporti nuk përngjan aspak me gjuhën e përdorur nga ambasadorja Yuri Kim.
“E ke dëgjuar ndonjëherë të flasë për patronazhistët, e ke dëgjuar të flasë ndonjëherë për ‘Peshkun e Madh’. Të gjithë deklaratat e znj. Kim, Eskobar dhe Palmer, piktura që japin kemi një djall të zi, opozita dhe Berisha dhe një partner të besueshëm Edi Rama. Ky raport nxjerr që korrupsioni i qeverisë është problemi kryesor”, tha analisti.
Andi Bushati e konsideroi raportin e 2021 të DASH për Shqipërinë “raportin më të zi që DASH ka bërë ndonjëherë për Shqipërinë”.
“Rama kur kapet me presh në duar, tallet. Është hera e parë që një dokument i DASH i djeg Ramës”, shtoi ai.
Ndërsa Baton Haxhiu thotë se raporti i DASH ka nënshkrimin e ambasadores Yuri Kim.
“Raporti është hulumtim i vetë ambasadës, nga media dhe nga takimet një nga një. Ambasada e monitoron punën e një qeverie dhe i dërgon raport shtetit të vet”, tha ai.
Sipas Haxhiut “nëse Kim gabon, humb karrierën”.
“Nëse jep informacion të gabuar nuk ka punë më, pasi është dikush që e verifikon”, tha ai duke shtuar se Kim e ka kritikuar qeverinë në qëndrimet e saj.
