Papa Françesku ka kritikuar sot agresionin e armatosur të Ukrainës si blasfemi dhe tradhti ndaj Zotit.
Udhëheqësi i 1,3 miliardë katolikëve të botës nuk përmendi në mënyrë eksplicite Rusinë apo Ukrainën, por vërejtjet e tij i referoheshin qartë konfliktit të vazhdueshëm midis Kievit dhe Moskës.
”Armët e Ungjillit janë lutja, butësia, falja dhe dashuria e dhënë falas për të afërmin, për çdo fqinj. Kështu sillet në botë paqja e Zotit”, tha papa Françesku gjatë audiencës së tij javore.
“Kjo është arsyeja pse agresioni i armatosur i këtyre ditëve, si çdo luftë, përfaqëson një fyerje kundër Zotit, një tradhti blasfemuese”, shtoi ai.
Gjatë rrjedhës së konfliktit Rusi-Ukrainë, ai ka dënuar në mënyrë të përsëritur luftën dhe ka bërë thirrje për paqe, por ka shmangur kritikat e drejtpërdrejta ndaj Moskës dhe presidentit rus, Vladimir Putin.
Sipas vëzhguesve, kjo është pjesërisht për shkak se Vatikani dëshiron të shmangë haptazi anësinë, me shpresë se mund të luajë një rol ndërmjetësues dhe pjesërisht sepse papa Françesku nuk dëshiron të shkaktojë një krizë në marrëdhëniet delikate të Vatikanit me Kishën Ortodokse Ruse, udhëheqësi i së cilës, patriarku Kiril është një mbështetës i vendosur i luftës, e cila filloi më 24 shkurt.
