9 maji është lakuar shpesh herë në qarqe të ndryshme ndërkombëtare se mund të jetë data e mundshme kur do të përfundojë lufta e Rusisë në Ukrainë, e njohur në histori dhe si Dita e Fitores ndaj nazizmit në Luftën e Dytë Botërore.
Burime të ndryshme, kanë bërë me dije se një Paradë ushtarake do të përgatitet në Moskë në këtë datë për të shpallur triumfin për “operacionin special” në Ukrainë, por nuk mendon kështu këshilltari i kreut të bashkisë së Mariupolit.
Sipas Petro Andryushchenko, Kremlini është duke e përgatitur Paradën e Fitores pikërisht në Mariupol, i cili për disa javë ishte kryeqendra e luftimeve në Ukrainë, dhe qyteti simbol që Rusia do të marrë në kontroll.
Këshilltari tregon se në bazë të informacioneve që ka siguruar, Moska ka urdhëruar administratën e vetëshpallur proruse që të pastrojë qendrën e qytetit nga rrënojat dhe kufomat për të organizuar më pas “sfilatën” e 9 majit. Andryushchenko shton se në Mariupol kanë mbërritur dhe organizatorët e paradës.
Më 9 maj Rusia feston çdo vit fitoren mbi nazistët në Luftën e Dytë Botërore, me një paradë imponuese në Sheshin e Kuq në Moskë. Duket se kjo ditë është destinuar për javë të tëra të bëhet simbolike dhe për betejën e re të Kremlinit kundër Ukrainës të përcaktuar “naziste”.
