Qeveria ka njoftuar se mund të ndërmarrë një amnisti fiskale. E thënë ndryshe, të legalizohen të ardhura e qytetarëve, pavarësisht burimit të tyre, kundrejt pagesës së një tarife. Sipas kryeministrit Rama, ky ka qenë vendimi i qytetarëve që i janë përgjigjur pyetësorit të Këshillimit Kombëtar.
Por amnistia e nisur nga Rama nuk është e para që ndërmerret në Shqipëri. Që pas viteve ’90, ka pasur disa nisma të tilla, që më shumë i kanë ngjarë një falje fiskale sesa amnistie të plotë, e cila teorikisht duhet të ndërmerret një herë në disa dekada dhe jo nga çdo qeveri që vjen në pushtet.
Kush përfiton nga ky proces dhe a ka risqe të tjera amnistia? “Ka disa kosto, pasi ti bën një amnisti, por ke shumë qytetarë apo biznese që kanë qenë të ndershëm. Duke bërë amnisti, instrukton popullin që edhe në të ardhmen do të ketë falje të tilla”, tha në A2 Business eksperti për ekonominë, Klodian Muço. “Gjithashtu është relativisht e vështirë që qytetarët që jetojnë jashtë të kenë para të padeklaruara. Si do t’i dërgojnë këto para, për shembull, nga Italia në Shqipëri? Ka një ligj që vendos limite në sasitë e parave që mund të fusësh. Aministia e fundit fiskale e bërë në Itali, pati me 0,007% të GDP”.
