Një person është arrestuar nga policia e Tropojës dhe një tjetër është shpallur në kërkim. Të dy akuzohen se kishin instaluar kamera dhe granata gati për shpërthim, në një parcelë ku dyshohet se kishin kultivuar bimë narkotike.
Këta persona janë të dyshuar si autorë edhe të një rasti tjetër të kultivimit të bimëve narkotike, në vitin 2020.
Më 10 Prill 2022, Gjykata e Tropojës ka caktuar ndaj tyre masën e sigurisë “Arrest në burg”, në mungesë, për veprat penale “Kultivimi i bimëve narkotike” dhe “Mbajtja pa leje e armëve luftarake dhe e municionit”, të kryera në bashkëpunim.
Në zbatim të vendimit të gjykatës, policia arrestoi A.H., 51 vjeç, banues në fshatin Kovaç dhe shpalli në kërkim B.Ç., 22 vjeç, banues në fshatin Kovaç.
“Bazuar në provat e siguruara, rezulton se këta shtetas, më datë 28.09.2021, në pyllin e fshatit Kovaç, në bashkëpunim me njëri-tjetrin, kanë kultivuar bimë narkotike, përreth të cilave kishin lidhur me fill sintetik 2 granata ofensive, si dhe kishin vendosur kamera, për të monitoruar zonën. Gjithashtu, këta shtetas, në bashkëpunim me njëri-tjetrin, dyshohen se në muajin korrik të vitit 2020, kanë kultivuar bimë narkotike, në fshatin Hoxhaj. Për këtë rast ishte regjistruar procedimi penal në Prokurori”, njoftoi policia.
