Nazmi Bandula, 55-vjeçari i cili u ekzekutua me armë zjarri mëngjesin e kësaj të Marte në Shkodër, është një emër i njohur për policinë.
Rreth dy vite më parë, iu vu tritol makinës së tij, që ishte e parkuar pranë banesës së 55-vjeçarit.
“Më datë 26.12.2020, rreth orës 20:25, në lagjen ‘Partizani’, Shkodër, mjeti i cili ishte i parkuar në oborrin e shtëpisë së shtetasit Nazmi Bandula, ne rrethana të paqarta dyshohet se ka shpërthyer si pasojë e lëndës eksplozive, duke shkaktuar vetëm dëme materiale”, thuhej në njoftimin paraprak të kohës së policisë për ngjarjen.
Në një prononcim për mediat asokohe, Bandula tha se nuk e kishte idenë kush mund ta kishte vendosur lëndën plasëse:
“Unë sapo isha futur në banesë dhe pak minuta më përpara kam qenë brenda oborrit. Jam ngjitur në shtëpi dhe më pas ka shpërthyer. Nuk e kam idenë se kush mund ta ketë vendosur. Fouristrada ime ka qenë e parkuar në oborrin e shtëpisë që në orët e paradites. Kam dalë në mëngjes, kam ngrënë diçka dhe më pas jam rikthyer në shtëpi dhe e kam lënë makinën aty brenda oborrit. Nga ai moment nuk e kam lëvizur më ndaj nuk e kam idenë se si mund të ketë ndodhur”.
Tre muaj para kësaj ngjarje, ai ishte arrestuar nga policia, që e akuzonte se kishte kërcënuar me armë zjarri të vëllanë e vet, për një konflikt për motive pronësie.
Raportohet se 55-vjeçari ka qenë i përfshirë në disa ngjarje kriminale. Sipas raportimeve mediatike, në të shkuarën, Bandula ka qenë i përfshirë në trafik narkotikësh, trafik armësh dhe prostitucion. Në vitet 2000, Nazmi Bandula bashkë me të vëllanë Albanin, janë akuzuar si të përfshirë në një vrasje për një vajzë pranë kinemasë në Shkodër. Tre vite pas kësaj ngjarje, Nazmi Bandulës i është bërë atentat në aftësi të Bushatit.
