Emri i këngëtares Zaimina Vasjari ka dalë në përgjimet e SPAK, një aksion që kishte për synim goditjen e policëve të korruptuar.
Për të kaluar doganën me fëmijë të mitur duhet të kesh një prokurë nga prindi tjetër, por me ndihmë të policëve, kjo u bë e thjeshtë për këngëtaren, e cila ka kaluar fëmijët e saj në kufi pa prokurën e posaçme.
“Panorama Plus” kontaktoi me këngëtaren për të marrë variantin e saj të ngjarjes.
“Unë kam një fëmijë tre javësh, dhe se kam lexuar fare, nuk kam kohë të merrem”, ka thënë këngëtarja.
Megjithatë në prononcimin e saj të shkurtër, ajo ka mohuar lajmin se ka udhëtuar drejt Kosovës me fëmijët pa prokurë.
“Është thjesht një lajm portalesh. Nuk është e vërtetë, unë nuk kam kaluar asnjëherë në Morinë me fëmijët. Kam një fëmijë tre javësh dhe po kaloj një kohë shumë të bukur. Nuk dua që emri im të lakohet nëpër portale për këtë çështje”, është shprehur Zajmina , e cila ka mohuar kështu përfshirjen e saj në përgjimet e policëve të arrestuar.
Zaimina Vasjari ka reaguar sërish për përfshirjen e saj në përgjimet e policëve në Morinë. Për Kryefjala.com, Zaimina tha me ironi se në udhëtimet e ardhshme do të dokumentojë çdo kalim në pikat e kufirit.
“Kjo gjë dihet botërishr që kjo nuk është hera e parë që emri im del nëpër portale, por me kalimin e viteve them që loja duhet të ketë rregulla dhe sidomos për histori të pavërteta që transformohen në lajme vetëm për klikime, duke përfituar disa dhe duke dëmtuar emocionalisht disa të tjerë. Më vjen keq që përmend portalet dhe mund të merret në sesnin negative, sepse shumë miq punojnë atje dhe ja u njoh përkushtimin. Historia në fjalë nuk është e vërtetë as nuk kam qenë në Morinë, as nuk kam kaluar nga Morina për në Kosovë. Udhëtimi që kam bërë në muajin janar ka qenë për pushime në Kroaci dhe kam kaluar tre kufij, atë shqiptar, atë të Malit të Zi dhe gjithashtu të Kroacisë. Nëse besojmë portalet, që kufirin shqiptar e kalove me “ndërhyrje” atëhere këto portale të më tregojnë faktet sesi kalova dy kufinjtë e tjerë. E thjeshtë: I kalova si çdo qytetar i thjeshtë sepse isha në rregull me dokumentat që kërkohen në pikat e kontrollit. Herën tjetër që udhëtoj do të postoj çdo gjë në story sidomos momentin e kalimit në pikat kufitare”. – ka treguar Zaimina.
