Një 36-vjeçar është arrestuar nga policia e Kukësit pas një episodi dhunë në familje. Sipas policisë, ai i preu gishtat të shoqes dhe e kërcënoi se do ta vriste atë bashkë me të vëllain.
“Shërbimet e Komisariatit të Policisë Kukës, pasi kanë marrë njoftim se në fshatin Kryemadh, shtetasi B.S. kishte konflikt me bashkëshorten e tij, shtetasen L.S., 35 vjeçe, të cilën e dhunonte dhe e kërcënonte me armë zjarri, kanë organizuar dhe finalizuar operacionin policor të koduar ‘Ndërhyrja’. Gjatë operacionit, shërbimet e Policisë kanë vënë në pranga shtetasin B S., 36 vjeç, i cili pas një konflikti me bashkëshorten, i kishte dëmtuar asaj gishtat e dorës, me mjet prerës (thikë) dhe e kërcënonte se do të vriste atë dhe të vëllanë e saj, me armë zjarri”, njoftoi policia.
Gjatë kontrollit në banesë, shërbimet e Policisë gjetën dhe sekuestruan në cilësinë e provës materiale një armë zjarri pushkë të mbushur me fishekë dhe një thikë, shtuan të njëjtat burime.
