Policia e Elbasanit arrestoi 53-vjeçarin Ylli Kryeziu nga Qukësi i Prrenjasit. Sipas Policisë, ai e kishte futur kontrabandë një sasi nafte dhe e shiste fshehurazi.
Si rrjedhim, Policia i vuri prangat dhe i sekuestroi 1250 litra karburant, pa faturë doganore në kuadrin e operacionit “Diesel”.
Policia e Elbasanit njoftoi se bazuar në informacionet e siguruara në rrugë policore për një shtetas që fuste hidrokarbure kontrabandë në vendin tonë, organizoi operacionin policor të koduar “Diesel”.
Në kuadër të këtij operacioni u arrestua në flagrancë për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Ruajtja ose depozitimi i mallrave kontrabandë” dhe “Fshehja e të ardhurave”, shtetasi Ylli Kryeziu, 53 vjeç, banues në fshatin Qukës, Prrenjas.
Gjatë kontrollit në magazinën e subjektit (bar-restorant), në pronësi të këtij shtetasi, janë gjetur dhe sekuestruar në cilësinë e provës materiale 1250 litra karburant, që dyshohen se janë futur kontrabandë, në vendin tonë.
Nga veprimet hetimore ka rezultuar se ky shtetas ka futur kontrabandë sasi hidrokarburesh në vendin tonë, të cilat i ka depozituar në ambientet e subjektit të tij dhe më pas i ka tregtuar duke fshehur të ardhurat.
Dosja e tij i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
