“Grup shushunjash, që i jeni vërsulur në xhepat e shqiptarëve dhe po i vidhni edhe gjakun”, iu drejtua ish-Kryeministri Sali Berisha, deputetëve socialistë, në seancën parlamentare.
Berisha tha se dilni dhe flisni në emër të shqiptarëve, ndërsa po u pini gjakun. “Janë ngritur çmimet e çdo produkti dhe ju e shisni këtë si mirëqënie të shqiptarëve.
Po çfarë jeni ju more, që s´po lini gjë pa i grabitur shqiptarëve? Ju jeni një grup shushunjash”, tha Berisha, fjala e të cilit u ndërpre nga Kryeparlamentarja Lindita Nikolla, pasi sipas saj, kjo nuk ishte procedura.
Çfarë denoncoi Berisha
“Të futet në rendin e ditës një anketë e re e narkoqeverisë e cila bazohet në pyetësorin jo të 500 mijë, por 1.2 mln shqiptarëve, kjo anketë e re dëshmon se qytetarët mendojnë se qeveria është bërë një me grupet mafioze të spekulimit dhe e tërë platforma e shpallur për kontrollin e çmimeve është kryekëput platformë për plaçkitjen, grabitjen e qytetarëve. Shkoni dhe bisedoni me furrat e bukës, pastiçierët, bar-man-ët. Çfarë thonë? Të gjitha thonë se qeveritarët po i ndajnë me bordet e tyre.
Ju flisni këtu në emër të 500 mijë shqiptarëve, unë flas në emër të 1.2 milionë shqiptarëve. Pse u mërzit ju kjo statistikë? E kuptoni ju që sot çdo shqiptar sheh këtu një grup shushunjash që janë vërsulur mbi xhepat e tyre me çmimet e energjisë, ushqimeve, transporteve, me të gjitha çmimet dhe po iu thithin gjakun. E nga ana tjetër u daklaroni se po i lumturoni. E kuptoni që po iu jepni vetëm thërrimet e atyre parave që po u vidhni shqiptarëve?”, tha Berisha.
