Kryeministri i Pakistanit është shkarkuar nga Kuvendi pasi nuk mori shumicën në një seancë votëbesimi. Më herët 69-vjeçari kishte pretenduar se Shtetet e Bashkuara kërkonin ta rrëzonin nga pushteti për të vendosur një qeveri të re pas afrimit të tij me Vladimir Putinin.
Kryeministri Imran Khan është shkarkuar nga Kuvendi i Pakistanit me 176 nga 342 vota pas mocionit të mosbesimit.
Partia e kryeministrit humbi shumicën e saj në Asamblenë Kombëtare në mars të këtij viti, kur shtatë deputetë nga aleati i saj në koalicionin qeverisës iu bashkuan opozitës.
Rivalët e Khan e kanë kritikuar qeverinë e tij për keqmenaxhimin e ekonomisë dhe keqpërdorimin e politikës së jashtme e të brendshme të Pakistanit.
Opozita pakistaneze tani do të paraqesë kandidatin e saj për të zëvendësuar Khan.
69-vjeçari kishte pretenduar më herët se opozita po i kërkonte fuqive të huaja të instalonin një qeveri të re pas rrëzimit të tij.
Në fjalimin e tij të së premtes mbrëma, Imran Khan u zotua se do të luftojë, duke u bërë thirrje mbështetësve të tij të dalin në rrugë.
Khan më parë akuzoi SHBA-të për të cilat pretendoi se kërkonin largimin e tij, pas përpjekjeve të qeverisë së tij për të kryer një politikë të jashtme të pavarur dhe pas vizitës së tij në Moskë në fund të shkurtit të këtij viti.
Politikani pretendoi se kishte një regjistrim nga ambasadori pakistanez në Uashington që vërtetonte akuzat.
Të hënën, zëdhënësja e Ministrisë së Jashtme ruse Maria Zakharova tha se Uashingtoni po përpiqej të dënonte Imran Khanin duke e hequr atë nga pushteti duke ndërhyrë në punët e brendshme të një shteti sovran.
Departamenti i Shtetit i ka mohuar pretendimet se ishte pas mocionit të mosbesimit.
