Një i ri është vënë në pranga për vjedhje nga policia e Dibrës.
“Bazuar në informacionet e grumbulluara, shërbimet e Komisariatit të Policisë Dibër, në bashkëpunim me DVP Dibër, kanë organizuar punën për identifikimin, lokalizimin dhe kapjen e autorit. Në kuadër të operacionit policor të koduar ‘Nightwalker’, u bë kapja e shtetasit F.K., 26 vjeç, banues në Peshkopi”, njoftoi policia.
Nga kryerja e veprimeve hetimore dhe provat e sekuestruara, dyshohet se 26-vjeçari, është autori disa vjedhjeve, shtuan të njëjtat burime.
Sipas bluve, i riu, gjatë orëve të vona të natës, dyshohet se ka kryer disa vjedhje në fshatin Arras dhe në qytetin e Peshkopisë – në një kancelari dhe në banesa.
Ndërkohë, vijojnë hetimet për të vërtetuar nëse i riu ka qenë i përfshirë në të tjera vjedhje.
