“Situata e pazakontë që po përjeton opozita duhet të na shqetësojë se jeta politike në një republike parlamentare nuk funksionon normalisht pa pasur alternativë përkundrejt shumicës”. Me këto fjalë Ditmir Bushati iu drejtua Kongresit Socialist, ku theksoi se PS duhet të jetë alternativa më e mirë qeverisëse dhe të mos bjerë në kurthin e vetëkënaqësisë.
Për Bushatin, kompromisi me opozitën është domosdoshmëri, që një mazhorancë të mos sundojë, por të qeverisë.
“Për fatet e përbashkëta të atdheut fjala kompromis nuk duhet konsideruar kurrë as si pazar i rëndomtë as si fjalë e ndyrë. Me opozitën ne s’kemi nevojë të jemi të ndarë por të ndryshëm. Opozita është mekanizmi i balancimit real jo i përjashtimit apo përplotësimit formal. Vetëm kështu do mundet që ne të qeverisim pa sunduar për një Shqipëri ku ia vlen të jetosh”, theksoi Bushati.
