Një 38-vjeçar është arrestuar në Tiranë pasi në banesë i janë gjetur armë, që sipas bluve, i kishte pa leje.
Operacioni i koduar “Vila” erdhi bazuar në informacionet e marra në rrugë operative se një shtetas mbante armë zjarri në banesë, njoftoi policia.
Në pranga u vu E.M., 38 vjeç, banues në rrugën “Bajram Cela”, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi, mbajtja, blerja, apo shitja pa leje e armëve të ftohta” dhe “Prodhimi dhe mbajtja pa leje e armëve të gjuetisë dhe sportive”.
Gjithashtu, po në kuadër të këtij operacioni, u shpall në kërkim shtetasi A. M., 58 vjeç, xhaxhai i shtetasit E. M., për veprën penale “Moskallëzimi i krimit”.
“Gjatë kontrollit të banesës së shtetasit E.M., në rrugën ‘Bajram Cela’, shërbimet e Policisë gjetën dhe sekuestruan në cilësinë e provës materiale, një armë gjahu shotgun, tre armë zjarri pistoleta me mulli, një pushkë sportive, tre armë antike, një krehër me municion luftarak, shtatë shpata antike, dy thika, një palë dylbi ushtarake dhe një armë zjarri ‘Sharrs’, të cilën shtetasi E.M., e kishte fshehur në garazhin në pronësi të xhaxhait të tij, shtetasit A.M.”, shtuan të njëjtat burime.
