Rusia po përpiqet në çdo mënyrë të justifikojë pushtimin e Ukrainës, duke hedhur dhe akuza ndaj Kievit zyrtar po inskenon skena të ndryshme të krimeve.
Sipas Kremlinit, Ukraina ka arritur deri aty sa ka paguar qytetarë të ndryshëm për të “aktruar” si viktima apo të plagosur të luftës.
“Autoritetet ukrainase janë duke rritur një fushatë për të përhapur akuza të rreme qëllimisht kundër ushtrisë ruse, gjë që ngre dyshime për sinqeritetin e pretendimeve të Kievit se ata duan të zgjidhin krizën përmes diplomacisë. Autoritetet ukrainase intensifikojnë çdo ditë fushatën e tyre dezinformuese anti-ruse, duke nisur akuza të pabaza për mizori të supozuara dhe krime lufte të forcave të armatosura ruse. Duke gjykuar nga retorika, udhëheqja e Ukrainës është e shtyrë jo aq nga shqetësimi për popullatën civile, por nga dëshira për të bërë imazhin e “viktimës” dhe për të diskredituar vendin tonë”, tha ambasadori rus në Shtetet e Bashkuara, Anatoly Antonov, sipas së cilit për këto skena i paguajnë qytetarët nga 25 dollarë.
Situata e luftës në Ukrainë sa vjen e tensionohet më shumë, me shifrat e viktimave civile që sa vinë e shtohen. Qyteti i Bucha-s tronditi opinionin ndërkombëtar pasi mbi 400 civilë u gjetën të vdekur nëpër rrugë pasi Ukraina mori nën zotërim qytetin.
Zëdhënësja e Shtëpisë së Bardhë, Jen Psaki, ka parashikuar se në Ukrainë do të ketë masakër të tjera si ajo e Buchas, duke theksuar se askush nuk duhet të ketë iluzionin se objektivat e Kremlinit kanë ndryshuar, pavarësisht tërheqjes së forcave ruse nga veriu i Ukrainës.
Po ashtu edhe zëdhënësi i Pentagonit, John Kirby tha se Ukraina “absolutisht” mund të fitojë luftën kundër Rusisë.
Më shumë se 400 njerëz janë të zhdukur nga qyteti i Hostomel, thotë një zyrtar lokal, teksa qyteti mbajti peshën kryesore të përparimeve ruse në kryeqytetin e Ukrainës, Kiev, së bashku me Bucha dhe Irpin.
