Pas Champions kthehet edhe kupa e dytë për nga rëndësia në kontinent. Tetë skuadra do të zbresin në fushë për ndeshjet e para çerekfinale të Europa League.
Barcelona shihet si favorite për ta fituar trofeun, ndërsa ekipet e tjera luajnë për një vend në finalen e 18 majit në “Ramon Sanchez-Pizjuan” të Sevilla.
Skuadra e parë që do të zbresë në fushë, prej orës 18:45 është Atalanta. Italianët luajnë në transfertën me Leipzig. Bergamaskët paraqiten në këtë sfidë pasi eliminuan një tjetër skuadër gjermane, Bayer Leverkusen dhe synojnë një vend në gjysmëfinale. Në anën tjetër, Leipzig u kualifikua pa luajtur, pas përjashtimit të rusëve të Spartakut të Moskës.
Për tri vendet e tjera në gjysmëfinale, Barcelona do të luajë në Frankfurt. Katalanasit vuajtën për t’u kualifikuar përballë Galatasaray, ku vendimtare ishte fitorja 2-1 në Turqi, ndërsa Eintracht vazhdoi më tej pas dy sfidave tejet të luftuara me Betis.
Duel mjaft i komplikuar dhe interesant edhe ai ndërmjet West Ham dhe Lyon. Francezët triumfuan minimalisht me Porton, ndërsa anglezëve iu nevojit koha shtesë për të përmbysur humbjen me Sevilla.
Rangers kërkon të konfirmohen në arenën ndërkombëtare, pasi eliminuan në mënyrë surprizë Borussia Dortmund dhe më pas Yllin e Kuq. Skocezët tashmë i pret testi me Bragën, që nga ana e saj eliminoi Monaco. Tri ndeshje të Europa League do të nisin në orën 21:00.
