Oleksandr Usyk ishte nga të parët sportistë elitarë që u rikthye në Ukrainë sapo Rusia nisi agresionin. Kampioni i botës në boks, tashmë ka marrë leje nga Ushtria e Terrotorit në Ukrainë për t’u rikthyer në Londër dhe për t’u përgatitur për duelin ndaj Anthony Joshua, një përballje që vlen 100 mln euro në total për të dy sportistët.
Gjithsesi, ai u shpreh se nuk mund ta largojë mendjen nga lufta edhe pse po jep maksimumin që të jetë në formën e duhur për t’u përballur me Joshua për titujt e unifikuar të botës në boks, IBF, WBA dhe WBO.
“Disa nga miqtë e mi mungojnë dhe ne nuk e dimë se ku janë tani. Shumë nga të afërmit e mi humbën shtëpitë e tyre, humbën miqtë dhe të dashurit e tyre. Të them të drejtën, gjithçka që po ndodh tani është mjaft e tmerrshme në Ukrainë. Çdo ditë lutem për përfundimin sa më të shpejtë të këtij tmerri. Në krahasim me luftën, boksi është lojë fëmijësh. Tani dua të përqendrohem sa më shumë në përgatitjen time sepse për momentin nuk mund të ndaloj së menduari për luftën, për miqtë e mi në Ukrainë. Mua më duhet të heq qafe mendime të tilla sa më shumë që të jetë e mundur, në mënyrë që të përgatitem mirë për duelin me Anthony Joshua dhe të jem në gjendje të lavdëroj përsëri Zotin tim dhe vendlindjen time.”
Përballja mes Oleksandr Usyk dhe Anthony Joshua është konfirmuar për në Qershor dhe vendi është përzgjedhur të jete në Arabinë Saudite.
