Pesë ushtarë të Forcës së Sigurisë së Kosovës (FSK) janë helmuar, derisa kanë ngrënë ushqim në kazermën “Newborn” në Gjilan.
Këtë e ka konfirmuar për Gazetën Insajderi, Inspektori sanitar i regjionit të Gjilanit, Shefik Beqiri.
Beqiri tha se në bazë të diagnozës së mjekësve dyshohet se janë helmuar disa ushtarët të FSK-së, por nuk dihet ende saktë se çfarë ka ndodhur.
“Në bazë të diagzozës së mjekve dyshohet se janë helmuar, po nuk ka diçka saktë ende”, tha ai.
Ai tha për Insjaderin se deri tani pesë ushtarë kanë marrë trajtim në Institutin Kombëtar të Shëndetësisë Publike në Prishtinë, por që ende nuk dihet numri i saktë i atyre që kanë shfaqur simptoma pas ngrënies së syfyrit.
“5 vetë kanë qenë në Institut, por numri nuk është i saktë deri tash”, tha Beqiri.
Beqiri shtoi se nesër do të dërgohen mostrat e marra në laborator, dhe se do të veprojnë në bazë të situatës.
“Kemi marrë shenjat klinike të ushtarëve, masat i kemi marrë sot, nesër në mengjes dorëzohen mostrat. Pastaj shohim se a kanë shenja ma të theksune. Po presim rezulatet”, tha Beqiri për Insajderin.
Gazeta Insajderi ka provuar të kontaktojë edhe zyrtarët e FSK-së dhe në IKSHPK, por që asnjëra palë nuk është përgjigjur në telefon dhe as në pyetjet e dërguara.
