Një 61-vjeçar, i arrestuar pak ditë më parë për ngacmim seksual të së bijës minorene, u la në qeli nga Gjykata e Korçës.
Jani Kallanxhi, që u ndalua para pak ditëve nga policia, ka mohuar akuzat përpara gjykatësve. Ai ka thënë se nuk e ka ngacmuar vajzën.
“Unë jam kujdesur për vajzën time, pasi bashkëshorten e kam të sëmurë”, mësohet të jetë shprehur i moshuari. Gjatë seancës, 61-vjeçari ka ngritur alibi që vajzën ia kanë ngacmuar persona të tjerë. Ai ka deklaruar që vajzën ia kishte marrë para disa ditësh pronari i një lokali me bashkëshorten, sepse donin t’i bënin një surprizë.
“Kam dyshime se mund ta kenë ngacmuar vajzën”, ka thënë ai para gjykatës. Kallanxhi ka deklaruar gjithashtu që ka kërkuar ndihmë nga bashkia, prefekti dhe shoqata të ndryshme për ushqime dhe për ta çuar vajzën në Tiranë, pasi është e sëmurë.
Prokuroria e Korçës dyshon se deklaratat e 61-vjeçarit për përfshirje të personave të tjerë në këtë skandal janë vetëm alibi. I vetmi person i vënë nën akuzë për ngacmimin e vajzës, dokumentuar edhe me prova filmike dhe dëshmi, është i ati.
