Ish- trajneri i kombëtares shqiptare, Gianni De Biasi, ka folur në një intervistë për “MilanNews.it”, ku ka komentuar luftën për titull në Itali. De Biazi është ndalur dhe tek elozhet për një nga talentet më të mëdhenj të Serisë A dhe futbollit Italian, Sandro Tonali.
Barazimi i Milanit ndaj Bolonjës një mundësi e humbur?
– “Nuk do ta thoja. Ishte thjesht një mundësi për t’u larguar me dy pikë nga skuadrat e tjera, por nuk bëhet fjalë për një ndeshje deçizive. Nga këtu deri në fund do të jetë e vështirë për të gjitha skuadrat”.
Skudeto vendoset në javën e fundit?
– “Mendoj se po. Ka një ekuilibër mes tre vendeve të para, dhe Juventus do ta thotë fjalën e saj. Kalendarët e skuadrave janë të ngjashëm, mund të vendoset në javën e fundit”.
“San Siro” i mbushur, një presion i shtuar për Milanin?
– “Sigurisht e dinin që kishin në dorë një ndeshje deçizive për sezonin, por në grupin e Milanit ka dhe lojtarë që janë mësuar me presionin në të tilla nivele. Ndodh të gabosh një ndeshje, nuk duhet ta stërmendosh dhe të nxjerrësh alibi”.
Torino, një ambient që ju e njihni shumë mirë, çfarë e pret Milanin?
–“Shumë e vështirë. Pavarësisht nga Torino, që ka një formacion shumë të mirë. Në këtë fazë të kampionatit të gjithë duan të tregojnë veten dhe të bëjnë pikë. Është faza vendimtare e kampionatit”.
Ibra-Zhiru, më mirë bashkë apo në rrotacion?
– “Për mënyrën si është ndërtuar Milani rrotacioni është gjëja më e mirë. Janë dy lojtarë që mund të japin shumë në këtë fazë. Pioli ka mundësinë të shqyrtojë situatën dhe të bëjë zgjedhjen më të mirë”.
Tonali ju ka impresionuar?
– “E kam ndjekur gjithmonë, në Breshia kam shumë miq. Është një lojtar shumë i rëndësishëm për lojën e Milanit. Sot për sot është i pazëvendësueshëm.”, u shpreh Xhani De Biazi.
