Kreu i Komisionit Qendror Zgjedhor në Serbi, Vlladimir Dimitrijeviç, ka bërë të ditur se sot në ora 7 të mëngjesit janë hapur të gjitha qendrat e votimit në Serbi, përveç njërës në Novi Pazar, ku ka ndodhur një rrahje mes punonjësve të kësaj qendre të votimit.
“Policia ka dalë në vendin e ngjarjes dhe kjo qendër menjëherë do të hapet. Pothuajse është e pamundur që nga 8267 qendra të votimit, të kemi problem në vetëm një. Është një festë për demokracinë, pasi po mbahen zgjedhjet për presidentin e Republikës, Parlamentit dhe zgjedhjet lokale në qytetet si Beogradi, Bori dhe 12 të tjera”, shtoi Dimitrijeviç.
Ai ka ritheksuar se të drejtë vote kanë 6 502 307 qytetarë, kurse serbët nga Kosova do të votojnë në komunat e Bujanovcit, Kurshumlisë, Rashkës dhe Tutinit.
Votuesit nga diaspora do të mund të votojnë në 77 qendra votimit në 34 vende të ndryshme të botës. Ndryshe në zgjedhjet e mbajtura sot në Serbi, deri në orën 9 kanë dalë 5.1 për qind e votuesve.
