Në një intervistë për Ora News, eksperti i çështjeve ligjore në PD, Çlirim Gjata u shpreh se SPAK-u nuk po tregonte vullnet me incineratorët edhe kur provat ishin sheshit.
Sipas tij, lidhur me aferën e incineratorëve kemi të bëjmë me një grup të strukturuar kriminal që shkon deri te ministrat dhe Rama.
Gjata: Incineratorët kanë filluar qysh në vitin 2016 me një denoncim nga mediat dhe pastaj kanë vazhduar denoncimet nga shoqatat. Në si PD kemi bërë tre denoncime në tetor 2020. Që atëherë kemi deklaruar se SPAK-u nuk po tregonte vullnet të merrej me këtë punë kur provat ishin sheshit. Provat ishin drejt një grupi të strukturuar kriminal që shkon drejt Ramës dhe ministrave të tij.
Grupi zbret poshtë te ministra dhe kryetarët e bashkive, deri te kryetari i bashkisë Tiranë që kanë futur duart në një aferë të tmerrshme korruptive në këto 30 vite. Deri më tani nga SPAK-u kemi marrë veprime vetëm ndaj një ish-ministri mjedisi që është ndër të fundit në radhë apo edhe për Bllakon që ka qenë sekretar i përgjithshëm. Diskutohet për shuma të vogla e ryshfet, ndërsa afera është 430 milionë.
Gjata shtoi se janë 12 VKM dhe urdhëra ministrash brenda një dite dhe se si është e mundur që kryeministri nuk di gjë me kaq vendime për një çështje të vetme.
Gjata: Hetim duhet të përfshinte nga majat më të larta, deri te ministrat e kryeministri i vendit. Janë gjërat të qarta dhe dokumentet janë aty. Kam frikë se SPAK-u nuk e ka vullnetin për të hetuar seriozisht këtë aferë të madhe. Janë 12 VKM dhe urdhëra ministrash brenda një dite. Çfarë është ky kryeministër që nuk di gjë me kaq vendime për një çështje të vetme. Si u bënkan akte ekspertimi për 1 ditë? Për afera të tilla shkojnë 20 milionë euro me një dorë. Si nuk dinka gjë kryeministri Rama, por për çfarë drejton ai? /Oranews/
