Detaje të reja raportohen pas arrestimit të Nuredin Dumanit, që mbeti i plagosur pranë fshatit Papër në Elbasan, dhe u kap nga RENEA në një apartament në Fier, të cilin e kishte marrë me qira.
Nga raportimet mediatike mësohet se Dumani, në momentin kur ra në pritë në fshatin Papër, ishte në drejtimin e mjetit tip BMW. Ai mbeti i plagosur me një plumb afër shtyllës kurrizore, nga persona që ende nuk janë identifikuar nga autoritetet.
Ndaj automjetit me të cilin lëvizte Dumani u qëllua me armë automatike, ndërsa raportohet se në automjet janë gjetur të paktën 17 shenja plumbash, 5 prej të cilave në anën e drejtuesit të mjetit.
Nga marrja në pyetje e Dumanit, një prej personave më të kërkuar nga policia shqiptare, nuk është arritur të zbulohet identiteti i autorëve, pasi i plagosuri ka thënë se nuk ka mundur të dallojë askënd.
Përveç sekuestrimit të disa armëve që dispononte Dumani dhe miku i tij Henrik Hoxhaj, policia ka gjetur edhe një shumë prej 2 mijë eurosh si dhe një bidon me benzinë në automjetin BMW.
Dumani ishte në kërkim për disa ngjarje të rëndë kriminale të ndodhura në qytetin e Durrësit. Ai akuzohet për vrasjen e Anxhelo Avdisë e Dorian Shkozës si dhe ekzektumin e vëllezërve Viktor e Besmir Haxhia, ngjarje të ndodhura në qytetin e Durrësit.
