Dy persona janë arrestuar nga policia e Lezhës, pasi në makinën me të cilën lëviznin janë gjetur 26 kg kanabis.
Në pranga u vunë Ardit Marku dhe Emiljan Gega.
Policia sqaroi se aksioni i koduar “Pllana”, i kryer nga seksioni për Hetimin e Narkotikëve, në bashkëpunim me shërbimet e Komisariatit të Policisë Lezhë dhe Forcën Operacionale në DVP Lezhë, erdhi bazuar në informacionet e marra në rrugë operative se dy persona po transportonin lëndë narkotike me automjetin e tyre, në aksin e vjetër rrugor Lezhë – Milot.
Si rezultat i kontrollit, brenda mjetit me drejtues Ardit Markuun dhe pasagjer Emiljan Gega, u gjetën 3 thasë plastmasi ngjyrë e zezë, të mbushura me material bimor të dyshuar lëndë narkotike, ku pas peshimit total të tyre rezultoi 26 kilogramë pesha e tyre.
Në këto kushte, u bë arrestimi në flagrancë i shtetasve Ardit Markut, 26 vjeç banues në Kurbin dhe Emiljan Gegës, 22 vjeç banues në Kurbin, për veprat penale “Prodhimi dhe shitja e lëndëve narkotike”, kryer në bashkëpunim.
Në cilësinë e provës materiale u sekuestruan lënda e dyshuar narkotike, automjeti dhe 2 aparatet celularë.
Nën drejtimin e Prokurorisë, vijon puna për identifikimin dhe kapjen e personave të tjerë të përfshirë në këtë veprimtari kriminale, thuhet më tej në njoftimin e policisë.
