Shqipëria po përballet me një tjetër krizë, atë të rritjes së çmimeve, ndërsa reagimet e Qeverisë për zbutjen e saj në raport me bizneset dhe qytetarët, vlerësohen si inekzistente.
Megjithëse nga Qeveria publikohen me popozitet paketat e ndihmës, veçanërisht lidhur me pensionistët dhe shtresat në nevojë, ato në fakt nuk mbulojnë as inflacionin e çmimeve.
Ndërkohë zv.Kryeministri Arben Ahmetaj sot ka deklaruar se turizmi nuk ka nevojë për mbështetje, ndërsa shprehet optimist për një sezon fantastik.
Në një intervistë për Faxnews, Ahmetaj shprehet se ky sektor nuk ka nevojë për mbështetje. Reagimi ka ardhur pas takimit që zv.Kryeministri ka pasur me përfaqësues të operatorëve turistikë apo shoqatave që operojnë në vend në fushën e turizmit.
“Unë mendoj se kemi një komunikim shumë të mirë me sipërmarrjen dhe me përfaqësuesit, mendoj se do kemi një sezon turistik fantastik. Mendoj se sezoni turistik këtë vit do jetë shumë i mirë për Vlorën dhe për gjithë Shqipërinë. Them se do kemi numra shumë pozitivë që do sjellin edhe të ardhura për qytetarët. Turizmi nuk ka nevojë të mbështetet, nevojë për mbështetje, kanë qytetarët”, tha Ahmetaj.
Ndërkohë vetëm pak ditë më parë operatorët turistikë në vend kanë shfaqur shqetësimin lidhur me problemet që po hapin pikërisht nga rritja e çmimeve, si dhe mungesa e mbështetjes nga Qeveria.
