Avokati i Nuredin Dumanit, Armand Tragaj tha në një deklaratë për mediat se klienti i tij nuk ka folur akoma për hetuesit, pasi nuk është në gjendje të mirë shëndetësore për të dhënë dëshmi.
“Dumani nuk ka pasur qëllim që të kryejnë vepër penale”, tha Tragaj, pyetur nga gazetarët për dyshimet e shkuarjes së Dumanit në Elbasan.
“Dumani nuk është në gjendje të mirë shëndetësore dhe nuk është mirë të flasë. Nuk di se kush e ka bërë atentatin, janë sekrete hetimore. Prokuroria pretendon se ka dijeni, por ne nuk e besojmë se ka dijeni. Klienti nuk ka pasur për qëllim për të kryer vepër penale, por lëvizte i armatosur për shkak të problematikave që ka dhe kjo nuk është më sekret”, tha avokati.
Dumani, një nga njerëzit më të kërkuar nga autoritetet shqiptare u arrestua tre ditë më parë në një apartament në Fier, ku fshihej prej kohësh. Ai ishte i plagosur pasi i ishte bërë atentat po atë natë, në aksin Papër- Elbasan.
Nuredin Dumani, ndodhet në spitalin e Traumës në Tiranë për shkak se i është nënshtruar një ndërhyrje kirurgjikale, pasi plumbi në shtyllën kurrizore i ka prekur edhe një anë të mushkërisë.
Gjykata e Posaçme i komunikoi këtë të premte në spital në orën masën e sigurisë “arrest me burg” Nuredin Dumanit, tri ditë pas arrestimit të tij.
