Deputeti Lulzim Basha prej ditësh ka nisur një tur takimesh në fshatra dhe qytete të ndryshme të vendit. Turi i Bashës, të paktën sipas deklaratave të tij, bëhet në kuadrin e asaj që ai e konsideron si shërbimi ndaj demokratëve.
Takimin e fundit Basha e ka mbajtur në Elbasan, ndërsa një ditë më parë ishte në Malësinë e Madhe.
Prej ditësh tashmë që pasi dha dorëheqjen nga posti i kreut të PD, Basha ka zhvilluar takime me demokratët larg syrit të kamerave, duke ngritur pikëpyetjet nëse kjo lidhet me krijimin e një lëvizje të re apo me një përpjekje për t’u rikthyer në postin e kreut të PD.
Ka zëra se Basha po tenton të krijojë një parti të re, edhe pse zyrtarisht pohon se nuk do të largohet nga PD. Ndoshta takimet e tij mund të kenë lidhje me krijimin e një fraksioni brenda PD, gjithsesi koha do e tregojë se çfarë po synon ish-kreu i demokratëve me takimet fshat më fshat e rrethinë më rrethinë.
