Nga Boldnews.al
Abuzimi me legalizimet në dëm të qytetarëve duket se ka kapur majat ditët e fundit, ku në zyrat qëndrore të Kadastrës në Tiranë, kanë mbërritur disa qytetarë nga Kruja. Ata janë përplasur me kreun e kadastrës Artan Lame në lidhje me legalizimin e një pallati nga ish-drejtori i ALUIZN-it të Krujës. Sipas burimeve nga qytetarët, legalizimi është kryer nga ish-drejtori, por më pas është kundërshtuar nga Lame dhe çështja është në proces gjyqi.
Acarimi ka qenë aq i madh sa po vetë qytetarët që reaguan shprehen se Lame ka qëndruar për një kohë të gjatë në zyrë, duke u ngujuar brenda dhe pavarësisht se ata ndodheshin në rrethimin e jashtëm të Kadastrës, ka thirrur policinë për t’i larguar. Kjo situatë ka zgjatur për të paktën katër ditë, ndërsa disa nga qytetarët që protestuan janë shoqëruar për pak kohë në polici.
Pikërisht abuzimet e kadastrës kanë sjellë edhe përplasjen mes qytetarëve dhe dy ndërtuesve të cilët i kanë shitur pronat dy herë, ndërsa legalizimi njeh vetëm njërin prej palëve, duke mos marrë në konsideratë asnjë kontratë të paraqitur nga blerësit. E gjithë abuzimi duket se është gatuar në Aluiznin e Krujës, për tu transferuar më pas në Tiranë, ku çështja në vend që të merrte zgjidhje u koklavit edhe më shumë.
Nuk është rasti i parë që Artan Lame, kreu i Kadastrës Shqiptare përballet me situata të tilla. Abuzimet, mitmarrja dhe tjetërsimi me pronat ka kapur kulmin dhe tashmë po shpërthen dita ditës duke sjellë reagimin qytetar që si mundësi të fundit po përdorin formën e ngujimit të Lamës në zyrë.
Për të dalë nga situata e ka pasur të vështirë, pasi nuk gjendet edhe ndonjë skutë e fshehtë që të largohet, ndaj i është dashur që të thërrasë policinë që të largojë personat që e prisnin jashtë godinës. Megjithëse e zgjidhi në këtë mënyrë ditën e parë, ajo i është përsëritur disa herë dhe Lame ka qëndruar për disa orë i mbyllur, duke mos pritur asnjë qytetar që shkon me mendimin se mund të zgjidhë hallet, por vetë Lame ka halle edhe më të mëdha nga prita që i bëjnë qytetarët e revoltuar.
Në çdo qytet të vendit ka problematika përsa i përket çështjes së pronave, ku përveç sorollatjes së qytetarëve që detyrohen të paguajnë nëndorë që të marrin shërbimin e duhur fenomeni më i rëndë është tjetërsimi i pronave. Të arrestuarit e fundit për shpërdorim detyre, korrupsion dhe falsifikim dokumentash janë disa nëpunës dhe ish-nëpunës të Kadastrës Tiranë që legalizuan një qendër shëndetësore në kundërshtim me ligjin, duke ia kaluar një individi. Gjithashtu mësohet se janë qindra raste të tjera në proces hetimi ku flitet për abuzime të rënda që në fund bien në kurrizin e qytetarëve.
