Nga Boldnews.al
Disa orë pas publikimit të skandalit të Syrit të Kaltër nga BoldNeës.al, kryeministri Edi Rama ka shkarkuar nga detyra drejtorin e Zonave të Mbrojtura, Zamir Dedej. Ky i fundit, në detyrë prej vitit 2015, ndërsa për vite me radhë ka qenë krahu i djathtë i ish-ministrit Blendi Klosi. Por, skandali i fundit pasoi ato të mëparshmit, duke filluar me parqet kombëtare, të cilat kanë filluar të degradojnë, apo edhe me lejet skandaloze për HEC-e brenda këtyre zonave. Por, Dedej do të mbahet mënd edhe për tenderat që i ka dhënë shoqatës së tij, apo edhe për tenderin e famshëm për parkimin e automjeteve në hotel “Plaza”.
Por, gjatë detyrës së tij në krye të Zonave të Mbrojtura, Dedej dha leje për HEC-e në Valbonë, në kanionet e Llëngës, Holtës apo edhe në Tepelenë. Për këtë të fundit, ai u padit në SPAK nga kreu i Bashkisë së Tepelenës. Por, ka dhënë leje edhe në kanionet e Osumit, apo edhe në parqet Shebenik-Jabllanicë, Korab-Koritnik, apo në Kune Vain në Lezhë. Me vendime tepër të dyshimta, Dedej, në vend që të mbronte këto pasuri, arriti që të shkatërronte këto vende.
Por, skandali më i fundit ishte ai i Syrit të Kaltër, një nga zonat më të bukura të Shqipërisë. Zona, po qepet e shqepet nga firma të kontraktuara nga AKZM-ja, e cila ka bërë disa tendera për ta kthyer Syrin e Kaltër në “pronë” të firmave apo individëve privatë. BoldNeës.al denoncoi në vijimësi për këtë skandal, që e quajtëm “biznesi” Kumbaro-Dedej. Ata tenderuan plot 300 mijë USD, për një projekt që parashikon ndërtimin e një parkimi, por jo në afërsi të vendburimit, por disa kilometra më larg.
Më saktësisht, në afërsi të rrugës nacionale Gjirokastër-Sarandë. Por, nëse qytetarët parkojnë në vendin e përcaktuar, si do të shkojnë deri te vendburimi?! Natyrisht, në këmbë, rruga përshkruhet për rreth 35-40 minuta, ndërkohë që në këtë zonë, me këto investime, parashikohet të lulëzojnë bizneset e para. Apo më saktë, firma apo individë të caktuar do ta administrojnë! Sërish në kurriz të shqiptarëve, të cilët po shohin dita-ditës që pasuritë publike po i marrin oligarkët.
Sipas dokumenteve që disponon Boldneës.al, kompania “Fusha”, e njohur fillimisht për lidhjet me kreun e Bashkisë së Tiranës, Erion Veliaj, ka fituar tenderin 300 mijë USD për ndërtimin e parkimit te Syri i Kaltër. Sipas dokumentit, drejtori i AKZM-së, Zamir Dedej, ka firmosur shpalljen e fituesit të tenderit “ndërtimi i hapësirave publike për akomodimin e automjeteve dhe aksesimin e tyre në zonën e mbrojtur ‘Syri i Kaltër’”.
Vlera e tenderit ishte 333 milionë lekë të vjetra, ndërsa kompania “Fusha” ka ofruar 283 milionë lekë të vjetra pa TVSH, ose me TVSH rreth 300 mijë USD. Por, aferta e kompanisë “Fusha” nuk ka qenë më e ulët, pasi kompania “Mane/s” ka ofruar 275 milionë lekë. Por, ashtu si edhe skema me tenderët e fituar në Bashkinë e Tiranës, Zamir Dedej ka s’kualifikuar ofertën më të ulët, duke shpallur fitues kompaninë “Fusha”. Arsyeja ishte se s’ka punë të ngjashme!
Syri i Kaltër në Sarandë, një nga zonat më atraktive në Shqipëri po shndërrohet në një biznes të mirëfilltë privat. Para disa muajsh, Ministria e Mjedisit e nxori në ankand këtë pasuri për t’ia dhënë privatit. Por, pas bërjes mediatike të ankandit, ish-ministri i Mjedisit, Blendi Klosi, tha se “shpallja ishte një gabim njerëzor”.
Më pas, kjo ministri tenderoi bërjen e rrugës, teksa pas shumë vitesh e vitesh premtime do të bëhej rruga deri te Syri i Kaltër. Por, pas rrugës, u tenderua edhe parkimi. Sipas dokumenteve që disponon Boldneës.al, parkimi do të vendoset në rrugën Qafa Muzinë-Sarandë, disa kilometra larg Syrit të Kaltër. Pra, disa kilometra larg Syrit të Kaltër. Por, si do të shkojnë turistët te Syri i Kaltër? Me tren, furgonë apo autobusë? Do t’i marrë AKZM-ja apo ndonjë subjekt privat që ka kontraktuar AKZM-ja? Duket se edhe Syri i Kaltër është kthyer në një burim fitimi, pasi pritet që t’i jepet totalisht privatit.
Lexo edhe:
“Biznesi” Dedej-Kumbaro me Syrin e Kaltër, firma “Fusha” fiton tenderin 300 mijë USD
