Media ukrainase “Ukrayinska Pravda” ka publikuar pamjet e rezidencës luksoze në Dubai që pretendohet se zotëron Presidenti i Republikës çeçene, Ramzan Kadyrov.
“Ukrayinska Pravda” shkruan se Kadyrov vizitoi Emiratet e Bashkuara Arabe 14 herë vetëm në 2021-2022, me avionin e tij privat.
Avioni luksoz
Avioni luksoz Airbus A319 me vlerë rreth 80 milionë dollarë u shfaq në vitin 2013. Dhe vetëm në vitin 2017 ai ra në vëmendjen e gazetarëve kur u publikua një foto nga një nga dhomat e gjumit të avionit nga propagandisti dhe këngëtari rus Timati.
Burimet e “Ukrayinska Pravda” në industrinë e aviacionit thonë: dizajni i brendshëm i avionit është zhvilluar nga një nga kompanitë më të shtrenjta në botë – British Winch Design.
Ku i mori Kadyrov paratë për një mënyrë jetese luksoze, shtron pyetjen media ukrainase.
Në vitin 2011, gazetarët arritën t’i bënin pyetje kreut të Çeçenisë në lidhje me burimet e të ardhurave të tij. Kadyrov u përgjigj: “Allahu jep. Nuk e di nga vijnë paratë”.
Më tej, “Ukrayinska Pravda” shkruan:
Që atëherë, mënyra e jetesës së Kadyrov vetëm është përmirësuar dhe pyetje të ngjashme nuk janë përsëritur. Dhe nëse supozojmë se Kadyrov me të vërtetë nuk e di se nga erdhën 80 milionë dollarët për të blerë aeroplanin e tij, atëherë kreu i Çeçenisë duhet ta dijë saktësisht pse ai fluturon kaq shpesh në Emiratet e Bashkuara Arabe. Nuk ka dyshim se avioni është i Kadyrovit: nëse analizoni të gjitha fluturimet, nuk mund të mos vini re se “shtëpia” e tij është aeroporti i Groznit dhe disa vizita dhe takime ndërkombëtare të Kadyrov në Moskë përkojnë. Vitin e kaluar, avioni i Kadyrov fluturoi në Emiratet më 4 dhjetor. 2 dhe 6 nëntor – rruga nga Çeçenia në Maldive. Po ashtu, në prill, mars, shkurt dhe janar. Në përgjithësi, avioni i Kadyrov viziton Emiratet pothuajse çdo muaj. Është e vështirë të imagjinohet se gjatë gjithë këtyre vizitave një person i nivelit financiar të Kadyrovit përdor hotele.
(Pamje nga avioni Airbus A319 )
Rezidenca në Dubai
Sipas “Ukrayinska Pravda”, vila e Kadyrov ndodhet në lokacionin e rezidencave mbretërore me pesë yje “Zabeel Saray” në Palm Jumeirah, Dubai.
Rezidenca raportohet se ka 21 dhoma, është një nga dy vilat më të mëdha në zonë dhe ka një ambient të izoluar.
Po ashtu, raportohet se ruhet nga roje private.
(Pamje nga rezidenca luksoze ku ndodhet vila e Kadyrov)
