Forcat speciale RENEA arrestuan mbrëmjen e së martës në qytetin e Fierit, Nuredin Dumanin, person i shpallur në kërkim dhe i cili dyshohet se ka marrë pjesë ose ka ekzekutuar 7 persona.
Kapja e Dumanit erdhi pak orë pasi u raportua se në fshatin Papër të Elbasanit kishte pasur një shkëmbim zjarri mes dy automjeteve. Nga raportimet e para u tha se në një nga makinat ndodhej Talo Çela, edhe ky një personazh i njohur dhe i kërkuar nga policia.
Dyshimet janë se Dumani ishte nisur drejt fshatit Papër atje ku jetonte një i afërm i Talo Çelës, por ra në një pritë, ku edhe mbeti i plagosur.
Nga raportimet mësohet se dyshimet janë se atentati apo prita ndaj Dumanit është ngritur nga Talo Çela ose persona të paguar prej tij. Hetuesit dyshojnë se Çela ishte vënë në dijeni me saktësi për lëvizjet e Dumanit, të cilin dikur e kishte pasur mikun më të besuar.
Megjithëse ende skema është e paqartë, burime nga grupi hetimor i thanë Tv Klan se kamerat e sigurisë në një biznes në zonë, kanë kapur dy makina që lëviznin me shpejtësi, pranë njëra-tjetrës, ku dyshohet se lëvizte Talo Çela dhe njerëzit e tij.
Pasi u qëllua në lëvizje, Dumani bashkë me një person tjetër janë larguar në drejtim të Fierit. Në banesën ku fshihej Nuredin Dumani, u gjet edhe një armë zjarri kallashnikov.
“Në këtë derë që po ruhet nga policia të katit të katërt të pallatit 9-katësh në lagjen Apollonia në Fier u arrestua Nuredin Dumani. Policia ndodhet në vendngjarje sepse grupi hetimor do të kthehet për te marrë të tjera prova materiale’.
Fqinjët e Dumanit tregojnë ai jetonte në këtë apartament prej pak kohësh.
Nuredin Dumani dhe Talo Çela janë dy nga personat më të kërkuar të drejtësisë. Ata dyshohet se qëndrojnë pas disa vrasjeve që kanë ndodhur nga Pranvera e 2020-ës e në vijim, fillimisht si bashkëpunëtor e më pas si kundërshtarë.
Dosja kryesore në të cilën Dumani akuzohet si bashkëpunëtor i Talo Çelës, është ajo e vrasjes së dy vëllezërve Haxhia në Pranverën e 2020-ës e cila rezultoi të kishte motiv lekët e grabitura në Rinas.
Pas kësaj vrasje, dyshohet se marrëdhënia e tyre u prish, teksa Prokuroria e Elbasanit beson se Dumani është ekzekutor i Bujar Çelës, vëllait të Talo Çelës. Ngjarje për të cilën ndodhet në kërkim.
Gjithashtu, Nuredin Dumani dyshohet edhe për vrasjen e shtetasit Klevis Kapllani më Rrogozhinë, ndërkohë është i skeduar për disa ngjarje të tjera në Elbasan, për të cilat nuk i është ngritur akuzë.
